林保全

林保全凭着精湛的配音功底，演绎了许许多多的知名卡通人物，他的声音早已和角色融为一体，换了任何其他配音来演绎那些角色，都会觉得突兀。他的声音如同家人的叫唤一般熟悉，曾几何时每天定时定候在电视剧里响起，陪伴几代人的年少岁月。（腾讯网 评）动画类1971年入行，三十几年嘅配音员生涯，林保全嘅声音真系陪伴咗好多香港人嘅成长，直到九十年代初，广东可以睇到香港电视台，从此，佢嘅声音亦陪伴著我哋。林保全，一谂起佢把声我就笑······哈哈哈······当叮当畀大雄激亲而发嬲嗰阵、当加菲猫冇厘精神讲啲搞笑对白同搞搞震嗰阵，当和珅畀纪晓岚戏弄而发出哭笑不得嘅笑声同尴尬嘅表情嗰阵，一谂起呢啲情景同场面我就喺度笑······林保全实在系一个好擅长配搞笑角色嘅配音员啊！讲起林保全，就一定要提到叮当。林保全帮叮当配音有差唔多25年，当年一开始嗰阵就睇林保全配音嘅叮当嘅嗰啲人，依家都已经系成年人啦！我谂佢哋对林保全一定有好深嘅感情，其实唔单只佢哋，我哋都系······有香港网友话：“冇林保全配音嘅叮当我系唔会睇嘅。”呢个系香港人对林保全配音嘅叮当嘅感情，实在系好深。的确，冇咗林保全配音嘅叮当系唔可以想象嘅，人气一定会下滑，可以讲喺大家嘅心目中，林保全就系叮当······电影类林保全所演绎嘅加菲猫亦都系好得人中意嘅角色，其中当然有林保全嘅功劳。试谂一下，如果系大陆嗰啲所谓嘅“配音员”配嘅加菲，会有人中意咩？魅力一定会大打折扣！我听过，真系惨不忍听······林保全配音嘅加菲就唔同喇，配得好生鬼、好搞笑，用一种好似瞓唔醒嘅语气同声调去配加菲，实在系好配合加菲嘅性格－－成条懒虫噉。林保全为不计其数嘅动画角色配音，其中有相当一部分系主角，例如《种子特务》嘅 草剃、《鬼神童子》嘅前鬼等等，都系配得相当好。不过佢为一啲年轻嘅角色配音，我就觉得佢把声显得有啲老喇。例如飞影、《饿狼传说》嘅泰利等。喺洪金宝八、九十年代嘅电影入面，林保全系洪金宝嘅专用配音员，大家喺睇洪金宝嘅电影嗰阵有冇觉得呢把声好似叮当嘅声呢？配和珅简直系入木三分，将和珅嘅狡猾、奸诈同搞笑嘅一面都表现晒出嚟，劲！林保全亦系明珠台播嘅电影入面，荷里活男星佐治古尼嘅专用配音员（因为我经常都睇明珠台嘅电影，所以知道······），喺呢个角色入面，林保全嘅声音多咗几分性感，应该系为咗配合佐治古尼呢个有型中年男人嘅气质，总之我系噉样觉得嘅。多谢林保全，佢为我哋带嚟咁多美好嘅回忆，呢啲回忆将会成为我人生嘅一部分······同时缅怀一下卢素娟。叮当同大雄，林保全同卢素娟，我一定会记住你哋······