黄丽芳

1.我对黄丽芳嘅印象相信同好多人一样，都系喺TVB播《美少女战士》系列嘅时候开始。当时细个，又喺一个冇咩娱乐嘅时代，所以一有动画片睇就兴奋到不得了，系动画片都睇得一餐，当然包括《美少女战士》。当时，《美少女战士》系列系我接触到嘅最早嘅美少女动画，觉得好新鲜，好靓嘅人物设定同变身吸引咗我嘅目光（睇嚟要畀人话弱智······）。几个系列嘅《美少女战士》，女主角月野兔嘅声音令我记起咗黄丽芳嗰把独特嘅声线，当时真系觉得把声好好听（奇怪，我唔知点解对曾佩仪配音嘅月野兔冇咩印象），纯粹系当时细个嗰阵嘅观点，唔知依家啲人点谂。不过我依家都系认为黄丽芳配月野兔系成功嘅，就算有有好多人话配得唔好，我心目中可以代表月野兔嘅声音就只系得黄丽芳一个（印象太深嘅关系？自己都唔知道。）。2.“黄丽芳嘅声音有啲沙沙哋，但又唔会好沙哑，特别系配一啲“熟女”嘅时候好有磁性，但系，我觉得佢配少女嘅话显得好似有啲老，就算系月野兔睇咗咁耐喇仲系噉样觉得。”有网友如此评论。黄丽芳嘅声音好似系有啲沙沙哋，不过唔系好明显。我认为黄丽芳系比较内敛嘅声线，属于低音嗰类型，系一把磁性嘅声音，带几分性感。佢配成熟嘅女性的确好有女人味，由于比较内敛同属于低音嗰类型，黄丽芳可能真系唔适合配少女角色······但系卡兰同李莓铃又令我再次中意咗呢把声，真系觉得配得好有感觉啊（我系唔系傻咗啊？）！黄丽芳仲反串咗好多男角，古拿比加、佐助、《怪医黑杰克》嘅孝男等等······佢沙沙哋嘅声线的确好适合配男仔嘅声音（处于变声期？），唔知大家认为如何。不过我就最惊佢配细路嘅笑声，唔可以讲佢唔自然，不过就系好怪，听到我起鸡皮······真系不敢恭维啊。越来越多嘅新人涌现，黄丽芳依家好似退居二线，好少为主角配音，最近几年几乎未见过，多数都系为配角同细路配音，但佢嘅实力系无容置疑嘅，真系希望佢有机会可以担当主角啊。不过佢所演绎嘅月野兔，我系永远都会记得嘅······